साउदीको असहयोगपछि ट्रम्पले ‘प्रोजेक्ट फ्रीडम’ रोके, इरानसँग वार्ता निर्णायक चरणमा.

वैशाख २५, २०८३ | शुक्रबार

अमेरिका र Iran बीच बढ्दो तनावका बीच हर्मुज जलमार्गमा जहाजहरूको सुरक्षित आवागमन सुनिश्चित गर्न सुरू गरिएको ‘प्रोजेक्ट फ्रीडम’ साउदी अरबको असहयोगका कारण रोकिएको खुलासा भएको छ।

अमेरिकाले मे ४ मा उक्त सैन्य मिसन शुरू गरे पनि अमेरिकी राष्ट्रपति Donald Trump ले एक दिनपछि नै अपरेसन रोक्न निर्देशन दिएका थिए। प्रारम्भमा पाकिस्तानको आग्रहमा अभियान स्थगित गरिएको चर्चा भए पनि अमेरिकी सञ्चारमाध्यम एनबीसी न्युजका अनुसार Saudi Arabia ले अमेरिकी विमानलाई आफ्नो हवाई क्षेत्र तथा एयरबेस प्रयोग गर्न अनुमति नदिएपछि अपरेसन प्रभावित भएको हो।

रिपोर्टअनुसार ट्रम्पले सामाजिक सञ्जालमार्फत अचानक मिसन घोषणा गरेपछि खाडी क्षेत्रका सहयोगी राष्ट्रहरू असन्तुष्ट बनेका थिए। साउदी युवराज Mohammed bin Salman सँगको वार्ताबाट समेत सहमति ननिस्किएपछि अमेरिकाले दुई दिनमा तीनवटा जहाज मात्र पार गराएर अभियान स्थगित गरेको जनाइएको छ।

यसबीच अमेरिका र इरानबीच कूटनीतिक वार्ता भने निर्णायक चरणमा पुगेको बताइएको छ। दुवै पक्षबीच १४ बुँदे समझदारीको प्रारम्भिक खाका तयार भएको अन्तर्राष्ट्रिय सञ्चारमाध्यमहरूले जनाएका छन्।

अमेरिकाले हर्मुज जलमार्गमा जहाज आवागमन सहज बनाउन United Nations Security Council मा नयाँ प्रस्ताव दर्ता गरेको छ। उक्त प्रस्ताव अस्वीकार गर्न इरानले सदस्य राष्ट्रहरूसँग कूटनीतिक पहल गरिरहेको बताइएको छ।

यसैबीच Beijing मा चीन र इरानका उच्च अधिकारीबीच भएको भेटवार्तामा China ले इरानलाई समर्थन जनाउँदै युद्ध रोक्नुपर्नेमा जोड दिएको छ। इरानले ट्रम्पको चीन भ्रमणका क्रममा बेइजिङ अमेरिकी दबाबमा नपर्ने अपेक्षा राखेको बताइएको छ।

सैन्य अवस्थाबारे बोल्दै ट्रम्पले अमेरिकी कारबाहीका कारण इरानको नौसेना, वायुसेना, मिसाइल प्रणाली तथा रडार नेटवर्कमा ठूलो क्षति पुगेको दाबी गरेका छन्। उनले सम्झौता हुन नसके अझ कडा सैन्य कारबाही हुन सक्ने चेतावनी पनि दिएका छन्।

तनावकै बीच हर्मुज क्षेत्रमा फ्रान्सेली शिपिङ कम्पनीको एक कार्गो जहाजमाथि मिसाइल वा ड्रोन आक्रमण भएको खबर सार्वजनिक भएको छ। घटनामा केही चालक दलका सदस्य घाइते भएका बताइएको छ।
© अनलाइन न्युज पोस्ट

👍 सेयर गर्नुहोस् ताकि अरू पनि अपडेट रहुन् .